Giza ekintzak gero eta espazio gutxiago uzten dielako bestelako bizidunei, gure ikastetxean eta inguru hurbilean zenbait lan egin ditugu aspaldiko urtetan. Batzuek ederto dakizuenez, horietako batzuk STEAM proiektuak izan dira eta ikasleekin parte hartu dugu Elhuyarrek Bilboko Arenalean antolatzen duen Zientzia Astean. Aurtengoa maiatzak 24 izango da.
Oraingo honetan naturan bizi diren zomorro txikienek zer nolako emozioak sortarazten diguten landu dugu ikasleekin, bereziki dibertsifikazioko 4. mailan daudenekin. Insektuak, lur azpian bizi direnak eta hegaz egiten dutenetan lerratu gara. Horretarako eta etorkizunean denongana zabaltzeko, zenbait esku-lan bideratu ditugu Kanpoko gela bat eraikitzeko iparralde aldera dagoen mikrobasoaren ondoan. Asmoa da bertatik bertara bizi direnak eta askotan ikasleak beldurtzen dituztenak ezagutzea, eurekin ditugun harremanak zabalduz eta desinstrumentalizatuz.
Beraz, ikastetxeko komunitate guztia gonbidatzen dugu, ikastetxera hurbiltzen zaretenean, atzeko aldera bertaratzera eta zuzenean ikustera eta parte hartzera, proiektuak feria eta gero martxan jarraituko duelako zenbait oztopo eta zailtasun direla bide. Baita, bi ostiral barru, eguerdian 11:00-14:00, izango den Zientzia astean gure etxolatik pasatzera ere.
